MPSC Exam dates: प्रलंबित परीक्षांचे काय? उमेदवारांचा प्रश्न, ‘एमपीएससी’च्या नऊ परीक्षा होण्याची प्रतीक्षा
Mpsc exam date 2024: 'एमपीएससी' मार्फत जाहीर केलेल्या या वेळापत्रकामध्ये पूर्व परीक्षा, मुख्य परीक्षांसह विविध प्रकारच्या २७ परीक्षांचा समावेश आहे. या परीक्षा ५ जानेवारी ते ३० नोव्हेंबरदरम्यान होणार असल्याचा उल्लेख वेळापत्रकामध्ये करण्यात आले असून, हे संभाव्य वेळापत्रक असल्याचे 'एमपीएससी'ने म्हटले आहे. गेल्या दोन वर्षाचा अनुभव लक्षात घेता यापैकी किती परीक्षा वेळेवर होतात, याबाबत परीक्षार्थीमधून शंका व्यक्त होत आहे.
गायत्री कुलकर्णी, नाशिक : महाराष्ट्र राज्य लोकसेवा आयोगामार्फत (एमपीएससी) नुकतेच २०२५ मधील विविध परीक्षांचे वेळापत्रक जाहीर करण्यात आले आहे. आयोगामार्फत या परीक्षांची तयारी सुरू करण्यात आलेली असली, तरी अद्यापही २०२४ मधील तब्बल नऊ परीक्षा प्रलंबित असल्याचे निदर्शनास आले आहे. त्यामुळे रखडलेल्या परीक्षांचे काय ?, असा प्रश्न परीक्षार्थी उमेदवारांमधून उपस्थित होत :आहे.
स्पर्धा परीक्षा देणाऱ्या उमेदवारांना परीक्षांची तयारी करता यावी म्हणून आयोगामार्फत गेल्या दोन वर्षांपासून डिसेंबर महिन्यातच पुढील वर्षांतील परीक्षांचे वेळापत्रक जाहीर केले जात आहे. एखाद्या पदासाठीची परीक्षा, जाहिरातीची तारीख तसेच परीक्षा व निकालाची तारीख यांचा या वेळापत्रकामध्ये समावेश असतो. या वेळापत्रकांनुसार विद्यार्थी परीक्षेच्या तयारीला लागतातही; परंतु आयोगामार्फत या वेळापत्रकाचे पालन केले जात नसल्याचे दिसून आले आहे. गेल्य दोन वर्षांपासून अनेक परीक्षा प्रलंबित राहात असून, २०२४ मध्ये घोषणा केलेल्या तब्बल नऊ परीक्षा अद्यापही झालेल्या नसल्याचे दिसून आले आहे.
काही परीक्षांसाठी संबंधित विभागाकडून मागणीपत्र नाही, काही पूर्व परीक्षा, तर काही मुख्य परीक्षेचे नियोजन नाही तसेच परीक्षा होऊनही मुलाखती नाहीत असा प्रकार गेल्या वर्षभरात ‘एमपीएससी’कडू झाला आहे. २०२४ संपत आले असताना आयोगाने जाहीर केलेल्या वेळापत्रकातील परीक्षांपैकी नऊ परीक्षा अद्याप झालेल्याच नाहीत. त्यामुळे अनेक उमेदवारांमध्ये नाराजी असून, परीक्षा प्रलंबित ठेवायच्या असतील, तर वेळापत्रक कशासाठी प्रसिद्ध करायचे, असा प्रश्न हे परीक्षार्थी उपस्थित करीत आहेत.
२७ परीक्षांचे नियोजन
‘एमपीएससी’ मार्फत जाहीर केलेल्या या वेळापत्रकामध्ये पूर्व परीक्षा, मुख्य परीक्षांसह विविध प्रकारच्या २७ परीक्षांचा समावेश आहे. या परीक्षा ५ जानेवारी ते ३० नोव्हेंबरदरम्यान होणार असल्याचा उल्लेख वेळापत्रकामध्ये करण्यात आले असून, हे संभाव्य वेळापत्रक असल्याचे ‘एमपीएससी’ने म्हटले आहे. गेल्या दोन वर्षाचा अनुभव लक्षात घेता यापैकी किती परीक्षा वेळेवर होतात, याबाबत परीक्षार्थीमधून शंका व्यक्त होत आहे.
रखडलेल्या परीक्षा
- यांत्रिकी अभियांत्रिकी सेवा
- महाराष्ट्र वनसेवा परीक्षा
- महाराष्ट्र गट ब (अराजपत्रित) सेवा संयुक्त पूर्व परीक्षा २०२४
- महाराष्ट्र नागरी सेवा राजपत्रित परीक्षा २०२४
- महाराष्ट्र गट-क संयुक्त पूर्व परीक्षा २०२४
- महाराष्ट्र वनसेवा मुख्य परीक्षा २०२४
- महाराष्ट्र गट-क सेवा संयुक्त मुख्य परीक्षा २०२४
- न्याय दंडाधिकारी प्रथम वर्ग पूर्व परीक्षा २०२४
- कृषी सेवा मुख्य परीक्षा -२०२४
‘एमपीएससी’मार्फत घेण्यात येणाऱ्या २०२५ च्या राजपत्रित स व अराजपत्रित संयुक्त पूर्व परीक्षा गट क, ब परीक्षांचे वेळापत्रक जाहीर केले. २०२४ मधील परीक्षांनाच विलंब झाल्यामुळे २०२५ च्या परीक्षांचे नियोजन अपेक्षपेक्षा उशिरा करण्यात आले आहे. ज्यावेळी मुख्य परीक्षा व्हायला हवी, त्यावेळी पूर्वपरीक्षा होत आहे. ‘एमपीएससी’ने २०२४ च्या परीक्षा वेळापत्रकाप्रमाणे घेतल्या असत्या, तर पुढील परीक्षांचे नियोजनही वेळेत करता आले असते.
– महेश घरबुडे, अध्यक्ष, स्पर्धा परीक्षा विद्यार्थी असोसिएशन
